Paano nga ba natin malalaman kung ano ang sinisigaw ng puso at isip natin? Wala na nga ba? O wala pa? Wala nang kilig at lambing sa iyong mga mata. Wala nang ganda sa aking umaga. Wala nang asukal sa mainit kong kape. Wala nang matatamis na salitang naririnig ko sa 'yong mga labi.
Wala na...
Wala na...
Ako'y gulong gulo sa mga kodigo at salitang binitawan mo na tila hanggang ngayon ay nakatatak parin sa isip ko na sa tuwing naalala ko ay wala na akong magawa kundi itanong sa aking sarili na; Wala na ba talaga? O wala pa? Hanggang kailan? Hanggang kailan ako magiisip? Hanggang kailan ako maguguluhan? Hanggang kailan ko itatanong sa sarili ko ang dalawang masasakit na salitang bumabagabag sa puso ko?
Wala pa, ano na?
Wala pang sagot sa mga tanong mo. Marami man akong dahilan para sukuan ka, mas marami akong nakikitang dahilan para ipaglaban ka. Mabilis man akong mapagod, pero sayo, mapagod man ako, alam kong sa huli, mapapawi lahat ng pagod ko, makita lamang kitang masaya. Masaya sa mga bagay na tunay na kaligayahan ang nabibigay sayo. Maging masaya sa mga panahong kahit ang sakit sakit na, titiisin ko, dahil mahal kita. Kahit na mahirap makita na may kasama kang iba, tatanggapin ko, dahil mahal kita. "Mahal parin kita".
Sa pagitan ng "wala na" at "wala pa", dito ko natagpuan ang kasagutan na parang sinampal ako ng katotohanan na "tama na, pagod ka na, magpahinga ka na" Tama na, oras na para bigyan mo ang sarili mo ng tunay na kasiyahan, Oras na para makita mo ang iyong tunay na kalagayan. Oras na para mapalitan na ang mga iyak at pag lumbay ng kasiyahang walang makakapantay.
Sa pagitan ng "wala na" at "wala pa", dito ko napagtanto ang mga bagay bagay. Mga bagay na dapat pinakawalan ko na ngunit hanggang ngayo'y nakakapit pa. Mga bagay na dapat tama na, ngunit dahil sa tadhana, paulit-ulit na nagiging mali at hanggang ngayon, pinipilit na lamang itama ang mga mali.
Sa pagitan ng "wala na" at "wala pa", dito ko naintindihan ang tunay na ibig sabihin ng dalawang salita. Wala na, ang katotohanang "tapos na" at wala pa, ang katotohanang "wag muna, pahinga muna"
Dito ko naintindihan ang tunay na ibig sabihin ng salitang "saya". Nasaktan ka man, umasa ka man, iniwan ka man, sa huli, ikaw parin. Ikaw parin ang magbibigay ng ngiti sa 'yong sarili at dito ko naintindihan na kung kayo talaga ang pinagtagpo ng tadhana, magtiwala ka, babalik at babalik ang tunay na pagibig.
Sa pagitan ng "wala na" at "wala pa"